Қазақстан жолдарында жүк көліктеріне қатысты 698 мың заң бұзушылық анықталды!
2025 жылғы мамырдан 2026 жылғы 1 сәуірге дейін республикалық маңызы бар автомобиль жолдарында жүк көліктерінің салмақ-габариттік параметрлерін асыруға байланысты шамамен 698 мың әкімшілік құқық бұзушылық белгісі тіркелді. Бұл деректер тәулік бойы жұмыс істейтін автоматтандырылған өлшеу станцияларынан (АӨС) алынған.
21 Апр 16:23
GService.kz`
41
2 мин чтения
Белгіленген салмақ-габариттік нормалардан артық жүк тасымалдау жол жамылғысының жағдайына айтарлықтай кері әсер етеді, оның тез тозуына әкеледі және автомобиль жолдарын жөндеу мен күтіп ұстауға кететін шығындарды арттырады.
Қазақстандағы халықаралық және республикалық маңызы бар автомобиль жолдарының жалпы ұзындығы шамамен 25 мың шақырымды құрайды. Олардың сақталуын қамтамасыз ету – елдің көлік инфрақұрылымын дамытудағы негізгі басым бағыттардың бірі.
Салмақ-габариттік параметрлердің сақталуын бақылауды күшейту мақсатында республикалық жолдарда 46 автоматтандырылған өлшеу станциясы орнатылған, оның ішінде 24-і 2025 жылы іске қосылды. Осылайша, соңғы бір жылда олардың саны екі есеге артты.
АӨС көлік құралдарының параметрлерін автоматты түрде тіркейді: жалпы салмағы, габариттері, мемлекеттік тіркеу нөмірі, маркасы және осьтер арақашықтығы. Алынған деректер автоматты түрде уәкілетті мемлекеттік органдарға жіберіліп, Қазақстан Республикасының заңнамасына сәйкес қаралып, тиісті шешімдер қабылданады.
Қолданыстағы нормаларға сәйкес, бір оське түсетін рұқсат етілген жүктеме 10 тонна. Көлік құралдарының ең жоғары рұқсат етілген массасы осьтердің саны мен конфигурациясына байланысты анықталады және 44 тоннаға дейін жетуі мүмкін.
Салмақ-габариттік нормаларды жүйелі түрде асыру жол жамылғысының тез бұзылуына, оның қызмет ету мерзімінің қысқаруына және жолдарды қалпына келтіру мен күтіп ұстауға арналған бюджет шығындарының өсуіне әкеледі.
Қазақстан Республикасының Әкімшілік құқық бұзушылық туралы кодексінің 571-бабына сәйкес, салмақ-габариттік параметрлерді асырып жібергені үшін 40-тан 1000 АЕК-ке дейін айыппұл қарастырылған (бұзушылық деңгейі мен тұлға санатына байланысты).
2028 жылға дейін автоматтандырылған өлшеу станцияларының санын 126-ға дейін жеткізу жоспарланып отыр. Бұл шаралар автомобиль жолдарының сақталуын арттыруға және оларды жөндеу мен күтіп ұстауға бөлінетін бюджетке түсетін жүктемені азайтуға бағытталған.
Для бизнеса
